Jól í Angra dos reis

Jæja, þessi heimsókn til Brasilíu fór nú ekkert sérstaklega vel af stað. Til að byrja með týndi flugfélagið töskunni okkar en hún blessunarlega skilaði sér þrem dögum síðar. Þá bilaði loftkælingin í herberginu sem við gistum í og það sem ég hélt að væri móskítóbit reyndist vera köngulóarbit og líkamleg viðbrögð helst til öfgafengin:

Eftir heita daga í Ríó þá keyrðum við suður til Angra dos Reis (flóa konunganna) föstudaginn 21. desember og ætlum að halda jólin hér á strandhóteli. Með í för eru s.s. pabbinn Alcio, systurnar þrjár og þrír tengdasynir.

Ég ætlaði nú alveg að bráðna í bílnum á leiðinni og loftkælingin í bílnum hafði engan vegin við - sáum 45 gráður á mæli á einum stað. En það rættist úr því þegar við komum á áfangastað, góður andvari niður við sjóinn og loftkæling í herberginu.

Ég hef ekki lifað að vera á svona stað áður en þetta er til víðsvegar um heiminn, resort þar sem þú ert í rauninni með allt til alls innan veggja hótelsins. Ströndin er voða fín en ég er að berjast við að fá þetta bit til að gróa og hef þess vegna ekkert farið í sjóinn ennþá. Í staðinn hef ég þurft að horfa upp á hina leika sér en það væsir svo sem ekkert rosalega um mig á sólbekknum.

Sé reyndar að lunginn af þessum myndum er af Juan að æfa sig á bretti, var svo ánægður með mig að ná seríu af honum klöngrast upp á brettið, nokkurn veginn rétta úr sér og byrja að róa og fara svo á bólakaf. Það er mikil pressa á mig að spreyta mig á þessu og vonandi að ég geti farið í vatnið fljótlega.

Reyndi að telja fb notendum trú um að neðsta myndin sé af fljúgandi diski í smíðum en þessu mannvirki er víst ætlað að hýsa okkur þegar kvöldmatur verður borinn fram að kvöldi 24. desember.

Ótrúlegt að í þessari órafjarlægð að heiman tókst mér nú samt að rekast á íslendinga. Vorum að borða hádegismat og ég heyri að einhver slær fram orðinu 'Iceland' í setningu á næsta borði. Fer að gefa borðinu gaum og sé að þarna eru 3 bláeyg og ljóshærð börn ásamt foreldrum og fylgdarfólki sem er greinilega frá Brasilíu. Eftir smá stund heyri ég eitt barnanna segja 'prófaðu að smakka þetta' og gat ekki annað en brosað.

Þó það sé ekki sérlega jólalegt um að litast þá reynir maður nú að setja sig í tilheyrandi stellingar. Er með bók í farteskinu og mjög svo til í að taka nokkra daga í slökun. Ég tengi jólin mest við rólegheit, át og samvistir með fjölskyldu. Þó sú nánasta sé víðsfjarri í þetta skiptið þá get ég stólað á þessa fjölskyldu sem ég hef eignast hérna hinumegin.

Þetta verður samt að mörgu leyti öðruvísi og þannig erum við að fara í siglingu til Isla grande (stóru eyju) á aðfangadag! Síðan er hér í grenndinni náttúruleg sundlaug og það er auðvitað ótækt annað en að prófa að baða sig þar. Sú ferð verður líklega farin á öðrum degi jóla og svo tygjum við okkur til Ríó og þá þurfum við líklega að ákveða hvar við ætlum að eyða áramótum. Ég er til í næstum hvað sem er, nema 2 milljón manna partíið á Ipanema strönd...